ना ही मिले रे भाई, नाही मिले रे, भाई रे, रंग मांही रंग मिल जाय
गुनां री जोडी नाही मिले॥ टेर ॥
कागा कोयल एक ही रंग है, बैठा एक ही डाल।
कागो बोले बेसुरो रे, कोयल शब्द सुनाय॥ 1 ॥
हँसा बगुला एक ही रंग है, बैठा एक ही पाल।
बगुलो तो मच्छियाँ गटकावे, हँसा मोतीडा चुग जाय.। 2 ॥
हल्दी केसर एक ही रंग है, बिक रही एक बाजार।
हल्दी तो सागां में सिजे, केसर तिलक लगाय॥ 3 ॥
डोली अर्थी एक ही रंग है, दोनूँ एक समान।
डोली तो महलां में जावे, अर्थी शमशाना मांही जाय॥ 4 ॥
साँझ और भोर एक ही रंग है, दोनूं एक समान।
साँझडली नींदडली लावे, भोर हुए जग जाग॥ 5 ॥
सत् ज तम गुण तीन है, तीनों लो पहचान।
कहत कबीर सुनो भई साधु, जानें सो सँत सुजान॥ 6 ॥